ارسال

گیان له‌ده‌ستدانی دوو لاوی دیكه‌ له‌ گرتووخانه‌كانی سنه‌ و چالۆس


2018-01-14| ۱۳۹۶-۱۰-۲۴

له‌ درێژه‌ی ناڕه‌زایه‌تییه‌ جه‌ماوه‌رییه‌كانی ئه‌م دوایانه‌ له‌ ئێران و گیان له‌ده‌ستدانی ژماره‌یه‌ك له‌ ناڕازییان له‌ گرتووخانه‌كانی ڕژیم، كاربه‌ده‌ستانی ڕژیم كوژرانی دوو كه‌سی دیكه‌یان‌ له‌ گرتووخانه‌كانی "سنه‌ و چالوس"ی پشتڕاست كردووه‌ته‌وه‌‌.
هه‌واڵه‌ گه‌یشتووه‌كان له‌ سنه‌ باس له‌وه‌ ده‌كه‌ن كه‌ هێزه‌ ئه‌منییه‌كانی ڕژیم، پاش دوو حه‌‌فته‌ له‌ بێسه‌روشوێن بوونی "سارۆ قاره‌مانی" له‌ ناڕه‌زایه‌تییه‌كانی مانگی به‌فرانبار له‌ ئێران، ڕۆژی شه‌ممه‌ ته‌رمی ناوبراویان ڕاده‌ستی بنه‌ماڵه‌كه‌ی كردووه‌ته‌وه‌. ته‌رمی "سارۆ قاره‌مانی" ته‌مه‌ن ٢٤ ساڵ ته‌نیا به‌ به‌شداری دایك و باوكی و به‌ ده‌خاڵه‌تی هێزه‌ ئه‌منییه‌‌كانی ڕژیم له‌ بێهشت محه‌ممه‌دی سنه‌ ئه‌سپه‌رده‌ی خاك كراوه‌. هه‌روه‌ها شه‌وی هه‌ینی ٢٢ی مانگی به‌فرانبار، لاوێك ناڕازیی ته‌مه‌ن ٢٦ ساڵ به‌ ناو "عه‌لی پوولادی" له‌ لایه‌ن هێزه‌ ئینتزامییه‌كانی ڕژیم له‌ چالوس ده‌ستبه‌سه‌ر و گواستراوه‌یه‌وه‌ بۆ گرتووخانه‌ی ئیتلاعات‌. به‌یانی ڕۆژی شه‌ممه‌ ٢٣ مانگی به‌فرانبار به‌ بنه‌ماڵه‌كه‌ی ڕاگه‌یه‌ندرا كه‌ به‌مه‌به‌ستی وه‌رگرتنه‌وه‌ی ته‌رمی ڕۆڵه‌‌كه‌یان بچن بۆ ئه‌م ناوه‌نده‌. برای ئه‌م لاوه‌ كوژراوه‌ وتوویه‌تی، كه‌ براكه‌م هیچ نه‌خۆشینێكی نه‌بووه ‌و له‌ كاتی ده‌ستبه‌سه‌ركرانیدا دۆخی ته‌ندرووستی باشی بووه‌. به‌ دوای گیان له‌ده‌ستدانی ئه‌م لاوه‌ له‌ گرتووخانه‌ی چالوس، كۆمه‌ڵێك له‌ ئه‌ندامانی بنه‌ماڵه‌ و هاوڵاتیانی چالوسی به‌ كۆبوونه‌وه‌ له‌ به‌رامبه‌ر ئیداره‌ی ئیتلاعاتی ڕژیم ده‌ستیانداه‌ی كۆبوونه‌وه‌ی ناڕه‌زایه‌تیی. پێشتریش سێ كه‌سی دیكه‌ له‌ ده‌ستبه‌سه‌كراوانی ئه‌م دوایانه‌ به‌ ناوه‌كانی، "وه‌حید حه‌یده‌ری، سینا قه‌نبه‌ری و مۆحسین عادڵی" له‌ زیندانه‌كانی ئه‌راك، تاران و دزفوول گیانیان له‌ده‌ستدابوو. ڕاپۆرته‌ ڕه‌سمییه‌كان باس له‌ گیان له‌ده‌ستدانی ٢٥ كه‌س له‌ ناڕه‌زایه‌تییه‌كانی ئه‌م دوایانه‌ ده‌كه‌ن. عه‌لی مۆته‌هێری، جێگری سه‌رۆكی مه‌جلیسی ڕژیم، ڕۆژی شه‌ممه‌ ڕایگه‌یاند، سێ كه‌س له‌ ده‌ستبه‌سه‌ركراوه‌كان له‌ ناڕه‌زایه‌تییه‌كانی ئه‌م دوایانه له‌ زیندانه‌كانی ئێران گیانیان له‌ده‌ستداوه‌."كاربه‌ده‌ستانی ڕژیم ئیدیعای ده‌كه‌ن كه‌ ئه‌م ده‌ستبه‌سه‌ركراوانه‌ ده‌ستیانداوه‌ته‌ خۆكوژی. ئه‌مه‌ له‌ حاڵێكدایه‌ كه‌ بنه‌ماڵه‌كانیان له‌ كاتێكدا كه‌ ته‌رمی ڕۆڵه‌كانیان ڕاده‌ست كرابووه‌وه‌، ئاسه‌واری ئه‌شكه‌نجه‌یان‌ به‌ سه‌ر جه‌سته‌یانه‌وه‌ دیبوو. له‌ ماوه‌ی ڕۆژانی ڕابردوو و به‌ دوای سه‌ركوتی ناڕه‌زایه‌تییه‌ جه‌ماوه‌رییه‌كان له‌ مانگی به‌فرانبار له‌ ئێران، نیگه‌رانییه‌كان له‌ئاست دۆخی ده‌ستبه‌سه‌ركراوان زیاتر په‌ره‌یسه‌ندووه‌.

دوایین هه‌واڵه‌كان